Heger bêjeyên ji cureyên din bibin navên rojname û kovaran

Gava ku bêjeyên ji cureyên din jî wekî navên rojname û kovaran bihên bikarînan, zayenda wan dibe mê û divê ku ew li gor referantên xwe yên nû bihên tewandin.

Nimûne 1: nû

Ev bêje bi xwe rengdêr e. Lê gava ku wekî navê rojname yan jî kovarekê bihê bikarînan, zayenda wê dibe mê û li gor wê dihê tewandin. Ango divê ku em weha binivîsin:

Ew nivîskarê Nûyêye. Ez Nûyê dixwînim. Hejmara Nûyê ya nû derket.

Em bibêjin ku ev rojname (yan jî kovar) bi xwe ne nû ye –dibe ku ew rojnameyeka (yan jî kovareka) sedsalî be- lê navê wê “Nû” ye. Loma nabe ku em weha binivîsin:

Hejmara Nû derket. Ez Nû dixwînim. Ew nivîskarê Nû ye.

Nimûne 2: serbixwe

Ev bêje bi xwe jî rengdêr e. Lê gava ku ew wekî navê kovarekê yan jî wekî navê rojnameyekê bihê bikarînan, li gor referanta xwe ya nû zayenda mê werdigire. Loma divê ku em weha binivîsin:

Ew nivîskarê Serbixweyê ye. Hejmara Serbixweyê ya nû derket. Ne rast e ku em weha binivîsin: ❌ Ew nivîskarê Serbixwe ye. ❌ Hejmara Serbixwe ya nû derket.